Il cuors da la vita da nos collega Francesco Barba, chi’d es mort als 30 settember da l'on passà, cumpiglia ün vast ring, dal süd da l'Italia al süd da la Germania fin in Engiadina Bassa.
Francesco es nat als 2 schner da l'on 1924 a Nocera Inferiore illa provinza da Salerno i’l süd da l’Italia. Là ha el passantà la scoula primara, per ir davo al Seminari ecclesiastic da la Baselgia catolica, ingio ch'el ha fat la matura. Lura sun seguits ils stüdis da teologia e dal dret ecclesiastic talian.
Dal 1945 es Francesco gnü ordinà sco preir da la Baselgia catolica. L'ordinaziun sco ravarenda da la Baselgia evangelica luterana da l’Italia (ELKI) ha gnü lö l’on 1960 a Firenze. Quistas duos datas cumpiglian ils 15 ons tanteraint cun temps d'otezzas e da plaschairs sco eir cun temps da tristezza, da pissers e dischillusiuns. Quels 15 ons han fuormà ed influenzà fich ferm la vita ed il pensar da Francesco.
Protet e cul sustegn da la Baselgia evangelica luterana da l’Italia (ELKI) ha Francesco pudü far ün stüdi a Neuendettelsau in Germania dal süd.
Quels stüdis til han dat la pussibiltà da dvantar ravarenda evangelic. Desch ons es Francesco stat ravarenda da la raspada evangelica da Bulsan.
Davo es el gnü l'on 1969 in Engiadina Bassa, l’ultima staziun dal ring vast. Là ha el surtut la pravenda da Zernez-Brail e Susch. I’l listess on es el eir gnü tut sü illa Sinoda a Sta Maria.
A Zernez- Brail e Susch es Francesco stat sco ravarenda sainza interrupziun fin pro sia pensiun l'on 1990.
Lura ha el amo lavurà duos ons a Scuol sco provisur.
Eir davo avair accumpli sia lavur sco ravarenda in uffizi, s’ha Francesco intressà in üna maniera critica, fin bod l’ultim, per differentas dumondas da la cretta e da la baselgia.
Ursina Hardegger, Pfarrerin und Kanzellarin der Synode